YSR పై ఓ అభిప్రాయం!!!

"YSR- ఓ అవినీతిపరుడు"
"YSR- ఓ ఫ్యాక్షనిస్టు"
"YSR- ఓ తెలంగాణా ద్రోహి"


ఇలా YSRని విమర్శించే వారి సంఖ్య ఈ మధ్య పెరిగిపోతుంది.. ఇలాంటి మాటలు విన్నప్పుడల్లా, నాకేమనిపిస్తుందో   మీతో పంచుకోవాలని ఈ వ్యాసం.. రాజకీయనాయకుడు అంటే -ఐదేళ్లకోసారి ప్రజల వద్దకెల్లి, నోటికొచ్చిన హామీలిచ్చి,కులం,మతం,ప్రాంతం వీటిలో ఏదో ఒకటి,వీలైతే అన్నీ గుర్తుచేసి, ఇంకా వీలైతే రెచ్చగొట్టి, వారి ఓటును తద్వారా అధికారాన్ని పొంది, మళ్ళీ ఎన్నికలు వచ్చే వరకు ఇచ్చిన హామీలను, ఓటేసిన ప్రజలను మరచిపోయి రాజయోగాలు అనుభవించేవాడు అని ప్రస్తుత అర్థం."  ఏ నాయకుడు గెలిచినా, ఏ పార్టీ అధికారంలోకి వచ్చినా సగటు ప్రజానీకం జీవితాలలో మాత్రం పెద్దగా మార్పు ఉండదు,గెలిచిన ఆ నాయకుని,అతని బంధువర్గ,అనుచరగణ జీవితాలలో తప్ప.. 2004కు ముందు వరకూ, రాష్ట్రప్రజలకు తెలిసిన రాజకీయమిదే..కానీ, 2004లో YSR ముఖ్యమంత్రిగా ప్రమాణస్వీకారం తర్వాత, ఓ రాజకీయ నాయకుడు తలచుకుంటే ప్రజల జీవితాలను ఎంతగా మార్చగలడో క్రమంగా అర్థమవుతూ వచ్చింది.ఇందిరమ్మ గృహాలు,ఆరోగ్యశ్రీ,వికలాంగ, వృద్ధాప్య పించన్లు,మైనారిటీ రిజర్వేషన్లు,విద్యార్థులకు ఫీజు రీఎంబర్స్మెంట్,108,104 etc..etc...రాష్ట్రంలో 80% పైగా ఉన్న దిగువ,మధ్య తరగతి కుటుంబాలలో, ప్రతి కుటుంబం  ఈ పధకాలలో కనీసం ఒక్క పధకం ద్వారానైనా లబ్ధిపొంది ఉంటుంది, వారు ఏ పార్టీకి చెందిన వారైనప్పటికీ.. రాష్ట్రంలోని అనేక గ్రామాల్లాగే సాధారణంగా ఉండే మా ఊర్లో, 2004 తర్వాత సెలవులకు ఇంటికెల్లిన ప్రతిసారీ, ఈ మార్పును అక్కడి ప్రజల జీవితాలలో చాలా స్పష్టంగా గమనించాను.వర్షాకాలంలో నీరు కారకుండా నీలం రంగు పాలిథిన్ పేపర్లతో, ఎండాకాలంలో గాలికి ఎగిరిపోకుండా పైన పెద్ద రాల్లతో కనబడే బోదకొట్టాలన్నీ పక్కా గృహాలైపొయాయి-ఇందిరమ్మ పధకంవల్ల. పెద్ద రోగమేదైనా వస్తే, పెద్ద పాపమేదో చేసిఉంటామనుకుంటూ తమలోతాము కుమిలిపోవటమే తప్ప కార్పోరేట్  ఆసుపత్రులవైపు కన్నెత్తి చూడటానికికూడా సాహసించని నిరుపేదలు, పైసా ఖర్చు లేకుండా,దర్జాగా వ్యాధులు నయం చేసుకొని ఇల్లకెల్లటం నాకల్లతో చూశాను-ఆరోగ్యశ్రీ వల్ల...ఊర్లోకి అంబులెన్స్ వస్తే, 'రెడ్డిగారి ' వీధిలో ఎవరికో బాగాలేదనుకొనే పరిస్థితినుండి, పేదోడి ప్రాణాన్ని కాపాడటానికి కూడా ఆఘమేఘాల మీద అంబులెన్స్ లు రావడం 'కుయ్ కుయ్ 'శబ్దాల సాక్షిగా చూశాను- 108వల్ల. టెంత్/ఇంటర్ తర్వాత, విమానటికెట్ కి,వీసా చార్జీలకి అవసరమైనంతడబ్బును అప్పుగా పొందగల స్తోమత ఉన్నోడు గల్ఫ్ లో ఒంటెలు కాసుకోడానికో,మరేదైనా కూలిపనికో.. ఆ మాత్రం స్తోమత కూడా లేనివాడు.. నాలుగు చక్రాల బండి మీద పండ్లు,కూరగాయలు అమ్ముకుంటూ..స్థానిక మసీదులోని ముల్లా చెప్పే 'స్వర్గపు కబుర్లు' వింటూ, పేదరికం దేవుడు పెట్టే పరీక్ష అనుకుంటూ నైరాశ్యంలో బతకటం..ఇదీ నాకు తెలిసిన ఒకప్పటి మైనారిటీ యువకుల దీనస్థితి. కానీ, ఇప్పుడు వీరిలో చాలా మంది MBA/MCA/BTech లు జాయినవుతున్నారు- మైనారిటీ రిజర్వేషన్లు,ఫీజు రీఎంబర్స్మెంట్ ల వల్ల.. ఇలా చెప్పుకుంటూ పోతే ఇంకా చాలా ఉన్నాయి.వీటన్నింటి వెనుక ఉన్న ఏకైక వ్యక్తి-YSR.


YSR మహాత్ముడు కాదు:


చట్టాలను అతిక్రమించో, చట్టంలోని లొసుగుల్ని ఉపయోగించుకొనో తన వాల్లకి అక్రమ ఆస్తుల్ని కూడబెట్టడం ప్రస్తుతం రాజకీయాల్లో నడుస్తున్న ట్రెండ్.YSR దీనికి అతీతుడేమీ కాదు. తన బంధు,అనుచరగణం అక్రమాస్థులు సంపాదించుకోవడంలో సహకారం అందించటం, లేకుంటే చూసీ చూడనట్లు వదిలేయటం చేసిఉంటాడనటంలో ఎవరికీ సందేహం అవసరం లేదు.. అట్లే YSR ప్రతిష్టాత్మకంగా ప్రారంభించిన జలయగ్నం మరియు ఇతర పథకాలలో కూడా భారీ ఎత్తున అవినీతి జరిగిఉంటుంది అనే దాంట్లో కూడా సందేహం లేదు. కానీ ఈ అవినితిని ఆసరాగా చేసుకుని, దేశంలో ఇప్పటివరకూ ఏ CMకి కానీ,ఏ నాయకునికి కానీ, కనీసం ఊహకైనా అందనంత మంచి పథకాలను ప్రవేశపెట్టిన YSRని, పేదప్రజల గుండెల్లోనుండి శాశ్వతంగా తొలగించడానికి ఓ పథకం ప్రకారం
కుట్ర జరుగుతుండడమే అసలు విషాదం. YSR అవినీతి గురించి, నిజాయితీగా వ్యవస్థలో మార్పు కోసం ప్రయత్నిస్తున్న JP లాంటి వారో,అవినీతికి పాల్పడే అవకాశం ఎప్పుడూ లేని,రాని కమ్యూనిస్టులో విమర్శిస్తే పరవాలేదు కానీ, అవినీతి వ్యవస్థలో తాము కూడా భాగమైపోయి, తమ హయాంలో సాధ్యమైనంత దోచుకున్న వారుకూడా-'మేమైతే కొంత తక్కువ దోచుకునే వాల్లం' అన్నట్లుగా విమర్శించటం హాస్యాస్పదం. ఇక YSR బతికి ఉన్నన్నాల్లూ తమ శకుని ఎత్తుగడలు ఫలించక, ఓ వైపు ప్రతి ఎలక్షన్లలోనూ తెలంగాణా ప్రజలు YSR పక్షానే నిలుస్తుండటంతో ఏంచేయాలో పాలుపోక అన్నీ మూసుకుకూర్చున్న కెసీఆర్ అండ్ కో, ఆయన మరణించిన ఒక్క సంవత్సరంలోనే రాష్ట్రాన్ని ఎలాంటి పరిస్థితుల్లోకి నెట్టేసారో కనిపిస్తూనే ఉంది. ఐనా, పార్టీలూ, ఉద్యామాలంటూ మొదలుపెట్టాక అపోజిషన్ వాడు ఎంత మంచోడైనా వాడిని తిట్టకుంటే మనుగడ ఉండదు కాబట్టి ఈ విమర్శలను కొంత వరకూ అర్థం చేసుకోవచ్చు. వీరందరూ కాక, YSRని విమర్శించే మరో గ్యాంగ్ కూడా ఉంది. అది -కాంగ్రెస్ లోని వృద్ధజంబూకాల గ్యాంగ్. వయసుతో పాటు YSRపై కుల్లు,ఈర్ష్య,అసూయ పెరుగుతూ వచ్చి, ఎవరికి చెప్పుకోవాలొ ఏం చేయాలొ తెలియక సతమవుతున్న ఈ ముసలి నాయకులు(?) ,ఇటీవల స్టేట్మెంట్లు ఇవ్వడంలో బిజీగా ఉన్నారు."YSR పధకాలన్నీ సోనియా పథకాలేనంటాడొకడు. మరి వేరే కాంగ్రెస్ పాలిత రాష్ట్రాల్లో ఈ పథకాలు ఎందుకు లేవు? కాంగ్రెస్ పార్టీ గెలుపులో తమ పాత్ర కూడా ఉందంటాడు మరొకడు.ఇది విని వాల్ల ఇంట్లొవారు కూడా నవ్వకుండా ఉండలేరు. సోనియా వల్లే YSR గొప్పవాడయ్యాడంటాడు ఇంకొకడు.YSRలేకుంటే కాంగ్రెస్ గతి ఏమయ్యేదో ఇప్పుడు సోనియాకు క్లియర్ గా తెలిసిఉంటుంది . కాంగ్రెస్ లోని ఇలాంటి నాయకులందర్ని 'ఏనుగును చూసి మొరిగే కుక్కలనవచ్చు ' కానీ కుక్కలలో కూడా ఇవి 'పిరికి కుక్కలు ' ఎందుకంటే ఏనుగు ముందు అరవడానికి భయపడి ఏనుగు వెల్లింతర్వాత, ఏనుగుకు వినపడకుండా సైలెంట్ గా మొరుగుతున్నాయ్ కాబట్టి. ఇక ఇలాంటి నాయకులతో నిండిన కాంగ్రెస్ పార్టీ భవిష్యత్తు ఏమిటో కాలమే చెప్తుంది.