'ఆత్మస్థుతి-పరనింద ' మాంచి కిక్ ఇచ్చే కాంబినేషన్

'ఆత్మస్థుతి-పరనింద ' జనాల్ని పోగెయ్యడానికి,రెచ్చగొట్టడానికి చాలా చక్కగా పనిచేస్తాయి. ఆత్మస్థుతి అంటే, మనందరం మంచోల్లం,మనది గొప్ప మతం/కులం, మనది మహా గొప్ప సంస్కృతి,మనది మహా పుణ్య దేశం.. ఇలాంటి స్టేట్మెంట్లు ఇవ్వడం అన్నమాట.. ఇక పరనింద అంటే, ప్రత్యర్థి వర్గాన్ని నోటి కొచ్చినట్లు తిట్టడం... ఆ ప్రాంతం వాల్లందరూ చెడ్డోల్లు, ఆ కులం వాల్లందరూ అహంకారులు, ఆ మతం వాల్లందరూ తీవ్రవాదులు etc..ఇలా డెసైడ్ చేసేయడం.  సహజంగా ప్రతి వాడికి,తన ప్రాంతం,కులం,మతం మీద మంచి అభిప్రాయం, ఓ రకమైన అభిమానం ఉంటుంది కాబట్టి, ఈ ఆత్మస్థుతి చేసే వాల్లందరూ మొదటి సారే నచ్చేస్తారు. ఇక, పక్కనోడు వెధవ అని అనుకోవటంలో, అంతర్లీనంగా నేను మంచోన్ని అనే అదో రకమైన తృప్తి వుంటుంది కాబట్టి, ఈ పరనింద కూడా వినటానికి చాలా హాయిగా/కంఫర్టబుల్ గా ఉండి, మెదడు యొక్క రీజనింగ్ పవర్ ని డామినేట్ చేసేసి,నిజానిజాల ఊసెత్తనీయకుండా చేస్తుంది.ఇక పదే పదే వింటూ ఉండటం, మాట్లాడుకుంటూ ఉండటం వల్ల, కొన్నాల్లకి మనకి తెలిసిందే నిజం అనే అభిప్రాయం స్థిరపడిపోయి, దానికి ప్రతిగా అవతలివాడు ఏం మాట్లాడినా, ఎన్ని ఆధారాలు చూపినా మనకు నమ్మాలనిపించదు. పైగా ఎదుటివాడు ఎంత బలంగా మన అభిప్రాయాలను తప్పని వాదిస్తే, అంతగా అతని మీద మనకు ద్వేషం పెరిగిపోయి, అతన్ని అవహేలన చేసో,తిట్టో మన ఈగో ని తృప్తి పరచుకోవటానికి ప్రయత్నిస్తాం.  ఈ ఆత్మస్థుతి-పరనింద, రీజనింగ్ ని ఎంతగా డామినేట్ చేస్తుందో, కొన్ని ఎక్జాంపుల్స్ ద్వారా వివరించడానికి ప్రయత్నిస్తా. ఇప్పుడు రాష్ట్రంలో జరుగుతున్న వేర్పాటు,సమైక్య ఉద్యమాల్లో నాయకులు ఆత్మస్తుతి-పరనింద ని వాడుతున్న తీరుని ఆల్రేడీ నా పాత పోస్ట్ లలో రాసిఉన్నాను.ఇక్కడ వాడుతున్న ఎగ్జాంపుల్స్ చూసి, అసలు ఇది రాసినోడు 'మనోడా', కాదా అనేది ముందు తేల్చుకోవాలని మీలో కొందరికి అనిపిస్తూకూడా ఉంటుంది( దానిని బట్టి, నేను రాసిందాన్ని, పొగడాలా, లేక తిట్టాలా, తిడితే ఎంత తిట్టాలి అనేది డిసైడ్ చేసుకోవచ్చని.)
Example speech #1.


"మనది చాలా గొప్ప సంస్కృతి. ఎన్నో మతాల్ని తనలో కలుపుకుంది మన సంస్కృతి.మన దేశం ఇప్పటి వరకూ ఎవరి మీదా దాడి చేయలేదు.కానీ మన దేశాన్ని ముస్లిం రాజులు దోచుకున్నారు. మన గుడులను, దేవాలయాలను  కూల్చేశారు.  మన సంస్కృతిని నాశనం చేసారు. ఇంకా ఎంత కాలం మనం చూస్తూ ఉండాలి..? "


పైకి చాలా సహేతుకంగా కనిపిస్తూ, ఒకింత సౌమ్యులని కూడా ఉద్రేక పరిచే అందమైన ఆత్మస్థుతి-పరనింద పై వాక్యాల్లో ఉంది. అదేంటో చూద్దాం.

రాజులు ఒకరి మీద ఒకరు దాడులు చేసుకోవటం, గెలిచిన రాజులు ఓడిన రాజ్యాల సంస్కృతిని నాశనం చేయటం అనేది అప్పట్లో చాలా మామూలు విషయం.మన దక్షిన భారతదేశంలోనే శివున్ని ఆరాధ్యదైవంగా పూజించే రాజ్యాలు కొన్నైతే, విష్ణువుని ఆరాధ్య దైవంగా పూజించే రాజ్యాలు కొన్ని ఉండేవి. వీరి మద్య పరస్పర యుద్ధంలో గెలిచిన వారు ఇతరుల ఆలయాలను కూల్చివేయడమో, లేక తమ ఆరాధ్య దేవుని విగ్రహాలతో నింపివేయటమో ఎన్నో సార్లుజరిగిందే.కానీ, 'ముస్లిం రాజులు మన గుడులు పడగొట్టారంట '  అనేదాంట్లో ఉన్నంత ఎమోషనల్ 'కిక్ ' మిగతా వాటిలో లేక పోవడం వల్ల మనం  దీనిని మాత్రమే గుర్తుపెట్టుకుంటాం. ఇక మనదేశం , ఇప్పటి వరకూ ఏ దేశంపై కూడా దాడి చేయలేదు అనేది, ఆత్మస్థుతికి ఓ గొప్ప ఉదాహరణ. సహజంగా, బాగా బలంగా ఉన్న దేశాలు, అందుబాటులో ఉన్న బలహీన దేశాల్ని ఆక్రమించుకుంటాయి. మనకంటూ ఓ స్వతంత్ర్య దేశం ఏర్పడింది 1947లో. మన దేశం ఎవరిమీదా దాడి చేయలేదు - అంటే దానర్థం, మన పూర్వీకులు ఎవరూ అసలు యుద్ధాలు చేయలేదనా? పల్లవులు, చాలుక్యులు,క్రిష్ణదేవరాయులు,శాతవాహనులు,ఇక్ష్వాకులు లాంటి వారందరూ మన పూర్వీకులే కదా..? వీరెవరూ యుద్ధాలూ,ఆక్రమణలూ చేయలేదా..? కానీ  మన కంఫర్టబుల్ మైండ్ మనల్ని ఇలా ఆలోచించనీయదు.   ఇక మన సంస్కృతి ఎన్నో మతాల్ని తనలో కలుపుకుంది అనేది మరో ఆసక్తికర అంశం. వేరే మతం వారిని ఇక్కడ బతకనిస్తుండటమే చాలా గొప్ప అన్నట్లుగా మాట్లాడుతుంటారు. కానీ, చాతుర్వర్ణ వ్యవస్తలో అట్టడుగునున్న కులాల వారు, సమానత్వం కోసం,  కుల వ్యవస్థ లేని Christianity,Islaam ల లోనికి మారటం వల్ల ఇక్కడ అవి బాగా వ్యాప్తి చెందాయి అనే నిజాన్ని మనం ఎప్పటికీ ఒప్పుకోం. ఎందుకంటే, ముస్లిం లందరూ అరేబియా నుంచి వచ్చారనీ(అంటే అరేబియా నుంచి వచ్చి మన మారుమూల గ్రామాల్లో/పల్లెల్లో స్థిరపడ్డారన్నమాట), క్రిష్టియన్లందరూ మిషనరీ లిచ్చే డబ్బులకి ఆశపడి వారి మతానికి అమ్ముడుపోయారనీ అనుకోవటం మనకు బోలెడంత Comfortness మరియు Satisfaction ఇస్తుంది.


Example speech#2 :


"మన మతంలో అసలు తీవ్రవాదులు,నేరస్తులు లేనే లేరు. కానీ ఆ మతంలో మాత్రం పుట్టిన ప్రతివాడు తీవ్రవాదే.కావాలంటే చూడండి, ప్రపంచవ్యాప్తంగా ఉన్న తీవ్రవాద సంస్థలన్నీ వారివే అంటారు."


మరి గుజరాత్ అల్లర్లలో అన్ని వందలమంది మర్డర్లు,మానభంగాలు, ఎలా జరిగాయంటే.. అబ్బే.. అదంతా గోధ్రా లో కరసేవకులు చనిపోవటం వల్ల ఆవేశంలో  ప్రతిచర్యగా జరిగిందే, దాని గురించి ఎక్కువ మాట్లాడవలసింది లేదు అంటారు. ఆవేశంలోచేసినా, ఆలోచించి చేసినా కుటుంబసభుల్ని కోల్పోయిన బాధ అందరికీ ఒకేలా ఉంటుంది కదా.. ఆ బాధను కొంత వరకైనా తీర్చేలా ఆ తప్పు చేసిన వారికి శిక్షలు వేయమని కసబ్,అఫ్జల్ గురు ల విషయంలో అడిగినట్లుగా ఎందుకు అడగం? అంటే సమాధానం ఉండదు.పైగా, అక్కడి కేసుల గురించి SupremCourt,CBI ఎమైనా మాట్లాడితే,హిదువుల్ని అవమానించటానికి అవి ప్రయత్నిస్తున్నాయని, అదంతా కాంగ్రెస్ వాల్లు వెనకుండి చేయిస్తున్నారని, ఇటలీ నుంచి వచ్చిన క్రిస్టియన్ సోనియా గాంధీ ఈ స్కెచ్ అంతా వేసారని మనం పెద్ద డిటెక్టివ్ లా ఆలోచిస్తాం.లేక ఎవరైనా సోకాల్డ్ నాయకుడు/బ్లాగర్ ఇలా విమర్శిస్తే ,చప్పట్లు కొట్టిమరీ వారిని ఎంకరేజ్ చేస్తాం. ఇక ప్రపంచ వ్యాప్తంగా తీవ్రవాదుల లిస్ట్ తీస్తున్నారు కదా, అట్లే అక్కడి ప్రజల సమస్యల లిస్ట్ కూడా తీయండి, పాలస్తీనాలో ఏం జరుగుతుందో, ఇస్రాయెల్ ఎలా,ఎక్కడ ఏర్పాటు ఐందో, ఏర్పాటైనప్పుడు దాని పరిమాణం ఎంత ఉండేది,ఇప్పుడు ఎంత ఉందో చూడండి, అల్ ఖైదాని ఎవరు తమ స్వార్థం కోసం పుట్టించారో ,అట్లే అక్రమ ఇరాక్ యుద్ధంలో చనిపోయిన, లేక అవిటివాల్లైన చిన్న పిల్లలపై కాసేపు జాలి పడండి అంటే, దానికీ సమాధానం ఉండదు కానీ, వాల్ల తరపున ఇంతగా మాట్లాడుతున్నాడంటే  వీడు కశ్చితంగా మనోడు కాదు అనేది కంఫర్మ్ , కాబట్టి వీడు చెప్పేది మనం ఇగ్నోర్ చేయాలి, లేకుంటే మాంచి పంచ్ డైలాగ్ తో అపోజ్ చేయాలి...ఇలా ఉంటుంది మన వైఖరి.
 
"మనం కత్తి పడితే అది గత్యంతరం లేక చేసే పవిత్రకార్యం, అదే ఎదుటివాడు చేస్తే అది తీవ్రవాదం, మతమౌఢ్యం"


ముగించే ముందు కొన్ని ముఖ్య విషయాలు:


* కాష్మీర్లో ఉగ్రవాదుల చేతిలో ప్రాణాలు కోల్పొయిన, మరియు ప్రాణాలు అరచేత పట్టుకుని వేరే ప్రంతాలకు తరలివెల్లిన కాష్మీరీ హిందూ పండిట్లూ, ఉగ్రవాదుల చేతిలో మరియు మిలిటరీ చేతిలో(టెర్రరిస్ట్లనే అణుమానంతో) ప్రాణాలు కోల్పోతున్న కాష్మీరీ ముస్లింలు వీరిద్దరీ బాధా ఒక్కటే. గోధ్రా రైల్లో కుటుంబసభ్యులను కోల్పోయిన కరసేవకుల కుటుంబసభ్యుల ఆవేదనా,ఆ తర్వాత గుజరాత్ అంతటా చెలరేగిన  అల్లర్లలో  గోధ్రా రైలు దహనంతో ఏ మాత్రం సంబంధంలేని, ( నిందితులది, వీరిదీ ఒకే మతం అనే ఒక్క కారణం తప్ప) హత్యలకు,మానభంగాలకు గురైన,  గుజరాతీ ముస్లిం ల రోదనా,ఆవేదనా ఒక్కటే. అట్లే, పార్లమెంట్ పై దాడి,1992 ముంబై అల్లర్లు,ఇటీవలి తీవ్రవాద దాడులు,అజ్మీర్,మక్కా మజీద్,లుంబినీ పార్క్ పేలుల్లుetc.. అన్నీ ఖండించాల్సినవే, అన్ని సందర్భాల్లోనూ నిందితుల్ని నిష్పాక్షికంగా విచారించి కఠినంగా శిక్షించాల్సిందే. దీనికి అన్ని మతాల, వర్గాల ప్రజలు పూర్తిగా సహకరించాల్సిన అవసరం ఉంది.
* ఇస్లామిక్,క్రిష్టియన్ దేశాల్లో అక్కడి మైనారిటీలను నీచంగా చూస్తారని చెప్తూనే, మనం మాత్రం మంచిగా ఎందుకు ఉండాలి, మనం వారికంటే మూర్ఖులమని నిరూపించుకుందామనటం ఏ సంస్కృతికి చిహ్నం?
* మంచి మనుషుల్ని తయారు చేయలేని మతమేదైనా మంచి మతం కాదు. ఎదుటి వాడి బాధను మతం కల్లతో చూసే వాడెవడూ మంచి మనిషి కాలేడు.
* మతాలన్నీ ఒక స్టేజ్ వరకూ మంచిగానే ఉంటాయి. దానితో రాజకీయం కలిసినప్పుడే అసలు చిక్కంతా. ఆ రాజకీయాల్ని అర్థం చేసుకోకుండా, ఆ మతస్తులందరినీ ఒకే గాటన కట్టి విమర్శించటంలో అర్థం లేదు.