జస్టిస్ మార్కండేయ కట్జూ ఆలోచనాత్మక వ్యాసాలు.

మాజీ సుప్రీం కోర్టు న్యాయమూర్తి, ప్రస్తుత ప్రెస్ కౌన్సిల్ ఆఫ్ ఇండియా చైర్మెన్ ఐన జస్టిస్ మార్కండేయ కట్జూ , భారతరత్న అవార్డు గురించి రాసిన ఆలోచనాత్మక  వ్యాసం ఇవాల్టి 'ది హిందూ'  లో ప్రచురితమైంది.

http://www.thehindu.com/opinion/op-ed/article2732614.ece 


జస్టిస్ కట్జూ 'కాలిదాస్-గాలిబ్ ఫౌండషన్' అనే సంస్థ ద్వారా అనేక సామాజిక సేవా కార్యక్రమాలు కూడా నిర్వహిస్తున్నారు. వివిధ సామాజిక రాజకీయ  అంశాలపై లోతైన విశ్లేషణలతో రాసిన అనేక వ్యాసాలు-  http://www.kgfindia.com  అనే వెబ్ సైట్లో ఉన్నాయి. 

ఉదాహరణకి  భారత దేశంలో చరిత్ర బోధన గురించి  రాసిన వ్యాసం నుండి కొంత భాగం ఇలా ఉంది-


"1928లో, టిప్పుసుల్తాన్ గురించి నేను పరిశోధన చేస్తున్న టైంలో, ఒక విధ్యార్థి సమాఖ్యకు సంబంధించిన కొందరు తాము స్థాపించబోతున్న చరిత్ర సంబంధమైన ఒక సంఘ ప్రారంభోత్సవానికి నన్ను ఆహ్వానించడానికి వచ్చారు. వారి దగ్గరున్న చరిత్ర పుస్తకంలో నుండి టిప్పుసుల్తాన్ గురించి రాసి ఉన్న ఒక వాక్యాన్ని చూసి దాదాపు నాకు కల్లు బైర్లు కమ్మినంత పనైంది. అది - "టిప్పుసుల్తాన్ 3 వేల మంచి బ్రాహ్మణుల్ని బలవంతంగా  ఇస్లాంలోకి మార్చడానికి ప్రయత్నించగా వారు ఆత్మహత్య చేసుకున్నారు అనేది" . ఆ టెక్స్ట్ బుక్ రాసింది మహామహోపాధ్యాయ హర్ ప్రసాద్ శాస్త్రి, కలకత్తా యూనివర్సిటీలో సంస్కృత శాఖాధిపతి. దేని ఆధారంగా ఆయన టిప్పుసుల్తాన్ గురించి ఈ వ్యాఖ్య చేశారో, దానిని నిరూపించే చారిత్రక ఆధారాలేమైనా ఉంటే తెలియజేయండని నేను వెంటనే శాస్త్రి గారికి రాయడం జరిగింది. ఇలా అనేక సార్లు అడగిన తర్వాత- మైసూరు గెజిట్ నుండి తీసుకున్నానని ఆయన నుంచి ప్రత్యుత్తరం వచ్చింది.   మైసూర్ యూనివర్సిటీ ప్రొఫెసర్ శ్రీకాంతియా ని ఈ విషయమై సంప్రదిస్తే, మైసూర్ గెజిట్లో ఏనాడు బ్రాహ్మణుల ఆత్మహత్యల గురించి రాలేదనీ, పైగా, విద్యార్థి దశలో మైసూరు చరిత్ర మీద తాను పరిశోధన చేశాననీ, ఇలాంటి సంఘటన ఏదీ మైసూర్లో జరగలేదని తాను కశ్చితంగా చెప్పగలననీ అన్నారు.   ఇంకా టిప్పుసుల్తాన్ ప్రధానమంత్రి-పునియా మరియూ సర్వ సైన్యాధిపతి- క్రిష్ణారావు ఇద్దరూ బ్రామ్హణులేననీ చెప్తూ, అప్పట్లో టిప్పుసుల్తాన్ 156 దేవాలయాలకు ప్రతి సంవత్సరం భరణం చెల్లించే వాడనీ ఆ దేవాలయాల లిస్టూ అట్లే శ్రింగేరి మఠాధిపతి జగద్గురు శంకరాచార్య గారితో టిప్పుసుల్తాన్ ఆత్మీయ సంబంధాన్ని తెలిపే ఉత్తరప్రత్యుత్తరాలకి  సంబంధించిన సుమారు 30 ఫోటో కాపీలను కూడా పంపించాడు.  
చరిత్రను వక్రీకరిస్తూ శాస్త్రి గారు రాసిన పుస్తకం అప్పటికే  బెంగాల్, ఒరిస్సా, యు.పి, అస్సాం, మధ్యప్రదేశ్, రాజస్థాన్లలో పాఠ్యాంశంగా బోదించబడుతుంది. అప్పటి కలకత్తా యూనివర్సిటీ VC-శ్రీ అశుతోశ్ ముఖర్జీ   గారికి, శాస్త్రి గారితో, మైసూర్ యూనివర్సిటీ VC -బ్రిజేంద్ర నాధ్ శీల్ గారితో, మరియూ ప్రొఫెసర్ శ్రీకాంతియా గారితో జరిపిన ఉత్తర ప్రత్యుత్తరాలనూ ఇతర అధారాలనూ పంపించి అసత్యాలను ప్రాచుర్యంలోకి తెస్తున్న వారిపై చర్య తీసుకోవలసిందిగా కోరడం జరిగింది. అశుతోశ్ ముఖర్జీ గారు వెంటనే స్పందించి శాస్త్రి రాసిన పుస్తకాలన్నింటినీ పాఠ్యాంశాలనుండి తొలగిస్తున్నట్లు ప్రకటించారు.  కానీ బాధాకరమైన విషయమేమంటే - విద్యార్థుల మనసుల్లో విద్వేషాల్ని నింపే  ఇలాంటి కట్టుకథలు ఇంకా అనేక పాఠ్యపుస్తకాలలో ఇప్పటికీ బోధిస్తూనే ఉన్నారు."

భారత దేశం మీదికి దండెత్తి వచ్చిన తొలితరం ముస్లిం పాలకులైన ఘజనీ, ఘోరీ లాంటి కొందరు హిందూ దేవాలయాలను కూలగొట్టిన మాట వాస్తవమేననీ, కానీ ఆ తర్వాత ఇక్కడ రాజ్యస్థాపన చేసిన అనేక మంది ముస్లిం రాజులు హిందువులతో సఖ్యతను కొనసాగిస్తూ వారి సంస్కృతినీ, దేవాలయాలనూ పరిరక్షించారనీ, కానీ 1857 సిపాయిల తిరుగుబాటు తర్వాత, హిందూ ముస్లింలు ఐక్యంగా ఉన్నంత కాలం వారి మీద ఆధిపత్యం చెలాయించడం సాధ్యం కాదని గ్రహించిన బ్రిటీష్ వారు, తమ 'విభజించి పాలించు' పధకంలో భాగంగా చరిత్ర వక్రీకరణకి పూనుకున్నారనీ వివరిస్తూ, వివిధ బ్రిటీష్ అధికారుల మధ్య ఈ విషయం గురించి జరిగిన ఉత్తరప్రత్యుత్తరాల్ని ఆధారాల్తో సహా జస్టిస్ కట్జూ గారు వివరించడం జరిగింది.  
ఆసక్తి ఉన్న వారు పూర్తి వ్యాసాన్ని ఇక్కడ చదువుకోవచ్చు. - 

http://www.kgfindia.com/kalidas-ghalib.php    

DC లో ప్రచురితమైన , సివిల్ సొసైటీ పై కంచ ఐలయ్య వ్యాసం లింక్

http://www.deccanchronicle.com/columnists/kancha-ilaiah/anna’s-social-fascism

ఆర్థిక వెనుకబాటు ఆధారంగా రిజర్వేషన్లు - అయ్యేపనేనా?

రిజర్వేషన్ల గురించి TVల్లో, వివిధ బ్లాగుల్లో ఎప్పుడు చర్చ జరిగినా ఆర్థిక వెనుకబాటు ఆధారంగా రిజర్వేషన్లు ఉండాలనే ఒక వాదన చాలా మంది వినిపిస్తుంటారు. ఆర్థిక వెనకబాటు ఆధారంగా రిజర్వేషన్లు అనేది ఓ మాంచి రొమాంటిక్ థాట్. ఆర్థికంగా వెనబడిన వాల్లకు రిజర్వేషన్లు ఇస్తాం, పేదోల్లెవరో వచ్చి క్యూ లో నిలబడండి అని ఒకసారి అనౌన్స్ చేసి చూడండి. బాగా డబ్బున్న మారాజులందరూ సొంత వాహనాల్లో వెల్లి, మేము చాలా పేదోల్లమంటూ క్యూ లో ముందు నిలబడ్తారు, చేతుల్లో MRO ఇచ్చిన ఆదాయ ధృవీకరణ పత్రాలతో సహా.(MRO చేతిలో ఎంత ఎక్కువ పెడితే, మన ఆదాయం అంత తక్కువగా రాస్తాడనేది తెలిసిందేగా) పాపం నిజంగానే డబ్బులేనోల్లేమో బస్సుల్లో,పాసింజర్ రైల్లలో వెల్లి క్యూ లో ఆఖరున నిలుచుంటారు.

అసలు మనదేశంలో ఎవరిదగ్గర ఎంత సంపద ఉందో, ఎవరి ఆదాయం ఎంతో,వంశపారంపర్యంగా అప్పణంగా వచ్చి పడుతున్న ఆస్తులెంతో ప్రభుత్వం దగ్గర ఏమైనా లెక్కలున్నాయా? పన్నులు ఎగ్గొట్టడానికీ, ప్రభుత్వ సంక్షేమ పధకాలు పొందటానికి ఉన్న అదాయాన్ని/సంపదను బయటపెట్టకుండా, మేము పేదోల్లమని ప్రకటించుకోవడానికి ఏమాత్రం సంకోచం లేని 120 కోట్ల ప్రజలున్న దేశంలో, అసలు అలా ఆర్థిక వెనుకబాటు లిస్ట్ తయారు చేయడం సాధ్యమయ్యే పనేనా..?

సాధ్యం కాని ప్రాత్యమ్నాయాలతో ఆదర్శాలు వల్లెవేయకుండా ఉన్న వ్యవస్థను కొనసాగిస్తూనే దానిలోని లోపాలను సవరించడంపై దృష్టిపెడితే బాగుంటుంది.

ఎలక్షన్లు,పార్లమెంట్,అసెంబ్లీలను నిషేధించాలి!!!

తిండి మానేసి నేను చెప్పినట్లు చేయకుంటే చస్తానని బెదిరించే ప్రతివాడూ గాంధీగారిలా ఫీలైపోవడం శోచనీయం. ప్రభుత్వాన్ని ఇరుకున పెట్టే పని ఎవరు చేసినా వారికి గుడ్డిగా మద్దతు పలికే ప్రతిపక్షాలు, TRP రేటింగ్ల కోసం గోరంతను కొండత చేసి చూపడంలో పోటి పడుతున్న మీడియా, వీరందరూ కలిసి ప్రజాస్వామ్యాన్ని అపహాస్యం పాలు చేస్తున్నారు.

మొన్నటికి మొన్న, తెలంగాణా ప్రకటించకపోతే చస్తానంటూ KCR నిరాహారదీక్షకు పూనుకున్నాడు. ఇంకేముంది పోతాండంట..పోబోతున్నాడంట..కోమా అంట.. అంటూ ఒకటే ఫ్లాష్ న్యూసులు. సహజంగానే చావు అనేది బలమైన సెంటిమెంట్ కాబట్టి ప్రజల్లో కూడా ఎక్కడలేని సానుభూతి. ఎద్దుపుండు కాకికి ముద్దన్నట్లుగా, నిరాహార దీక్ష భగ్నం చేయడానికి ప్రభుత్వం చేసే ప్రయత్నాన్ని ప్రాధమిక హక్కుల ఉల్లంఘన అంటూ, ప్రభుత్వాన్ని ఇరుకున పెట్టే ప్రతిపక్షాలు ఉండనే ఉన్నాయి.ఇక వేరే గత్యంతరం లేక కేంద్ర ప్రభుత్వం డిసెంబర్ 9 ప్రకటన చేయడం, చర్చలు,సంప్రదింపులు లేకుండా తీసుకున్న ఈ నిర్ణయం వల్ల ఆ తర్వాత జరిగిన సంఘటనలు తెలిసిందే.

KCR దీక్ష నుండి స్పూర్తి పొందాడో ఏమో గానీ, అవినీతి గురించి ఇప్పుడే తెలిసినట్లుగా, ఇప్పటికిప్పుడే దానిని అంతమొందిస్తానన్నట్లుగా దీక్షలకు పూనుకుంటున్నాడు అన్నా హజారే. ఇక peepli live మీడియా, ప్రభుత్వానికి మైనస్ ఐతే, మనకు ప్లస్సే అనుకునే ప్రతిపక్షాలు ఉండనే ఉన్నాయి.

సరే ఇప్పుడు దీనికి పరిష్కారం ఏంటి? అన్నా హజారే బృందం చెబుతున్నట్లుగా వారు తయారు చేసిన లోక్పాల్ బిల్లుని పార్లమెంటులో పెట్టి ఆమోదించేయడమా? ఇక ఆ తర్వాత వీరు మల్లీ ఇలాంటి దీక్షలకు పూనుకోకుండా మూటా ముల్లే సర్దుకుని,పౌర సమాజాన్ని మూసేసుకుని హిమాలయాలకు వెల్లిపోతారా..? లేక,  దేశ ప్రజలకు  ప్రభుత్వం పైన కంటే, ఇలాంటి పౌర సమాజం పైన మాత్రమే నమ్మకముంది కాబట్టి పార్లమెంటుని, అసెంబ్లీలని రద్దు చేసి, అన్నా హజారే గారి అధ్యక్షతన పౌరసమాజాన్నే పాలించమందామా..?

అన్నా హజారే దీక్షకు వస్తున్న స్పందనను చూసి, భవిష్యత్తులో మరికొంత మంది నాయకులు ఇలా దీక్షల బాట పడితే పరిస్తితి ఏంటి..?
ఉదాహరణకి ముంబై లోని మరాఠా ప్రజలకి అన్యాయం జరిగి పోతుందని బాల్ ధాకరే గారు మహారాష్ట్ర లోని ఊరూ వాడా తిరిగి, ఉన్నవి లేనివీ జనాలకి నూరిపోసి, ముంబై నుండి ఇతరుల్ని తరిమి వేయాలని ఆమరణ నిరాహార దీక్షకు కూర్చుంటే..?
తమిళులకి దేశంలో తీరని అన్యాయం జరుగుతుందనీ, తమిలులకి, కాష్మీర్ తరహా ప్రత్యేక మినహాయింపులో,లేక ప్రత్యేక దేశమో కావాలని కరుణానిధి నిరాహార దీక్షకు పూనుకుంటే..?

దేశంలో రిజర్వేషన్ల వల్ల అగ్రకులాల యువకులకు తీరని అన్యాయం జరుగుతుందనీ, రిజర్వేషన్లను ఎత్తేయ్యాలనీ ఏ సుబ్రమన్య స్వామి లాంటి వారో ఆమరణ నిరాహార దీక్ష కి సిద్ధపడితే. సహాజంగానే అగ్రకులాల ప్రజలు ఆయన దీక్షకు మద్దతుగా తండోపతండాలుగా తరలి వస్తారు.ఇక peepli live మీడియా ఉండనే ఉంది.

ఇక అప్పుడు రిజర్వేషన్లను తీసేద్దామా..?

ఇప్పటికే ఎలక్షన్ల నిర్వహణకి బోలెడంత ప్రజాధననం ఖర్చవుతుందంట. కాబట్టి భవిష్యత్తులో ఎలక్షన్లను నిషేధించి వాటి స్థానంలో దీక్షల పోటీలను  పెట్టాలి. అంటే ఎవరు ఎక్కువ రోజులు నిరాహార దీక్ష చేస్తే ఆ నాయకునికి దేశంపైన,ప్రజలపైన అంత ఎక్కువ ప్రేమ ఉన్నట్లు నిర్ధారించి వారికే పాలించే అవకాశం ఇవ్వాలి. జై దీక్షలు..జై జై దీక్షలు.

My previous post on the similar topic:

http://andamainacheekati.blogspot.com/2011/06/blog-post.html

ఆజాద్ చర్చలు - ఫ్లాప్ మూవీకి రీమేక్!!!

2010లో, తెలంగాణాపై తేల్చటానికని కేంద్ర ప్రభుత్వం ఓ ఐదుగురు తటస్థులతో నీతి నిజాయితీ గల నికార్సైన వ్యక్తిగా పేరున్న జస్టిస్ శ్రీక్రిష్ణ గారి అద్యక్షతన ఓ కమిటీని ఏర్పాటు చేసింది. తెలంగాణాలోని అన్ని రాజకీయ పార్టీలు,ప్రజా సంఘాలు ఈ కమిటీ ఎదుట హాజరై తమ వాదనలు, అభిప్రాయాలు వెలిబుచ్చారు. దినపత్రికలు,వార్తలు రెగ్యులర్ గా ఫాలో అయ్యేవారికి ఎవరికైనా అప్పట్లో చర్చల అనంతరం బయటికి వచ్చిన తెలంగాణా నాయకులు T.V మైకుల ముందు ఏమన్నారో గుర్తుండే ఉంటుంది. "కమిటీ సభ్యులు మేం చెప్పింది పూర్తిగా,శ్రద్ధగా విన్నారు", "తెలంగాణాకు అనుకూలంగా రిపోర్టు ఇస్తారని మాకు పూర్తి నమ్మకం కలిగింది" లాంటి అభిప్రాయాలు దాదాపు అందరి నోటినుంచి వచ్చాయి. KCRగారైతే మరో అడుగు ముందుకు వేసి, జస్టిస్ శ్రీక్రిష్ణ గారి నైతికత హిమాలయాలంత ఎత్తు అనీ, రిపోర్టును ఎలాంటి ప్రలోభాలకు లొంగకుండా నిజాయితీగ ఇస్తారనే నమ్మకముందని స్టేట్మెంట్లిచ్చేశారు. ఇదే రకంగా సీమాంధ్రా నాయకులు,ప్రజాసంఘాల వాదనలు కూడా విన్న శ్రీక్రిష్ణ కమిటీ, తెలంగాణా వారు చెప్తున్న అన్యాయం,దోపిడీ లాంటివి వట్టిమాటలని తేల్చెశారు.ఇక అప్పటిదాకా శ్రీక్రిష్ణ మంచోడు,మంచోడు అన్న నోల్లే, రాత్రికి రాత్రి ప్లేటు ఫిరాయించేసి ఆయన మీద ఎలాంటి ఆరోపణలు చేశారో గుర్తుండే ఉంటుంది. "జస్టిస్ శ్రీక్రిష్ణ అమ్ముడుపోయారు"," శ్రీక్రిష్ణ కమిటీ దిక్కుమాలిన కమిటీ","సీమాంధ్ర నాయకుల ప్రలోభాలకు లొంగిపోయారు" లాంటి స్టేట్మెంట్లు ఇవ్వడంలో తె.గ నాయకులు పోటీ పడ్డారు.
ఇక మధుయాష్కీ ఐతే- సీమాంధ్ర నాయకులు శ్రీక్రిష్ణ కమిటీ సభ్యులకు దుబాయ్ లో ఫ్లాట్లు కొనిచ్చారనీ, దీనికి తన దగ్గర ఆధారాలు కూడా ఉన్నాయనీ సమయమొచ్చినప్పుడు బయట పెడతాననీ నిస్సిగ్గుగా చెలరేగిపోయాడు. ఆ ఆధారాలు ఎప్పుడు చూపిస్తావని తర్వాత తెలంగాణాలో ఎవరూ మధుయాష్కీని అడగలేదు, ఈయన చూపించనూ లేదు. తమ ప్రజల అమాయకత్వం మీద ఈ నాయకులకి ఎంత నమ్మకమో!

ఇలాంటి నిరాధార,అడ్డగోలు ఆరోపణలతో శ్రీక్రిష్ణ రిపొర్టు 'ఓపెనింగ్స్ బాగున్నా, కమర్షియల్ గా ఫ్లాప్' ఐన సినిమాలా తయారయ్యింది.ఇక లేటెస్టు గా, ఈ ఫ్లాప్ సినిమాను రీమేక్ చేయడానికన్నట్లుగా  ఆజాద్ మల్లీ చర్చలు షురూ చేసి, తె.గ కాంగ్రెస్ నాయకులతో గంటలు గంటలు మంతనాలు సాగించాడు. ఈ మీటింగుల నుంచి బయటికి వచ్చిన తె.గ నాయకుల స్పందన, శ్రీక్రిష్ణ కమిటీతో చర్చల అనంతరం లాగానే ఉంది. -"తరతరాలుగా తెలంగాణా కి జరిగిన అన్యాయాన్ని కల్లకు కట్టినట్లు ఆజాద్ కి వివరించాము, ఆయన చాలా శ్రద్ధగా విన్నడు.మద్యలో అక్కడక్కడా కంటతడి కూడా పెట్టిండు.( వెనక నుంచి- ముక్కు కూడా చీదుకున్నడు), కాబట్టి తెలంగాణాకి అనుకూలంగా నిర్ణయం తీసుకుంటడని మాకు పూర్తిగా నమ్మిక ఉన్నది". ఇక షరా మామూలుగానే తర్వాతి రీలు, సీమాంధ్ర నాయకులతో చర్చలు. వీరితో కూడా చర్చలు ముగించాక కాంగ్రేస్ హై కమాండ్ కి, ఆజాద్ రిపోర్టు సమర్పిస్తారట. ఈ రిపోర్టు కూడా ఎలా ఉండబోతుందో ఊహించటం పెద్ద కష్టం కాదు. కాకపోతే ఈ రిపోర్టును తయారు చేయటానికి ఆజాద్ 2 నెలలు సమయం కావాలన్నాడట. అంత టైం ఎందుకు అంటే రంజాన్ ఉంది కాబట్టి అనేది ఒక రీజను. రంజాను కీ, చర్చలకీ సంబంధం ఏమిటో..? ఉపవాసాలు ఉంటూనే,చర్చలు గట్రా చేయకూడదా..? ఏదేమైనా, ఆజాద్ నివేదిక ఎప్పుడు ఇచ్చినా.. శ్రీక్రిష్ణ కమిటీ లాగానే ఆజాద్ కూడా ఆరోపణలు,నిందలు భరించటానికి సిద్ధం కావాల్సిందే. "ఆజాద్ అమ్ముడు పోయాడు", "ఆజాద్ ద్రోహి"," ఆజాద్ కి సీమాంధ్రా నాయకులు చంద్ర మండలంలో ఫ్లాట్ కొనిచ్చారు,దీనికి మాదగ్గర బోలెడన్ని ఆధారాలు ఉన్నాయి" లాంటి కామెంట్లు భవిష్యత్తులో బుల్లి తెర సాక్షిగా చూడాల్సి రావచ్చు. అప్పటిదాకా Lets wait and see..

అవినీతి-దీక్షలు-ప్రజాస్వామ్యం-సినిమా!!!

ఫస్టాఫ్ లో ఎక్కడ చూసినా అవినీతి,అరాచకత్వం రాజ్యమేలుతుంటుంది. ప్రజలందరూ, ఈ అవినీతి వల్ల నానాకష్టాలు  పడుతుంటారు.ఇదంతా చూసి మన హీరో గారికి రక్తం ఉడికి పోతుంటుంది. చూసే ప్రేక్షకులకి కూడా సేం ఫీలింగ్... ఇంటర్వెల్ కి ముందు ఓ పెద్ద ట్విస్ట్. అప్పటిదాకా సాధారణ వ్యక్తిగా ఉన్న మన హీరో గారికి ఓ మంత్రదండం లాంటి అతీత శక్తో, లేక రాత్రికి రాత్రి, CMగానో,PMగానో మారిపోవడమో జరుగుతుంది. దానితో మన హీరో గారు రెచ్చిపోయి, "ఇక అవినీతి పరుల భరతం పడతానని ఓ పంచ్ డైలాగ్ తో శపధం చేస్తాడు. చూసే జనాలకి ఎక్కడలేని ఎక్సైట్మెంట్!!  ఇక సెకండ్ హాఫ్ లో, అవినీతి పరులతో హీరోచితంగా పోరాడి, మొత్తానికి సినిమా ఐపోయే టయానికి అవినీతిని, సంస్కారవంతమైన XXX సబ్బుతో కడిగినట్లు, కడిగిపాడేస్తాడన్నమాట.ప్రేక్షకులు మస్తు ఖుష్, సినిమా బంపర్ హిట్!!.ఇది ఇప్పటికే దాదాపు అన్ని భారతీయ భాషల్లోనూ టెస్టెడ్ సక్సెస్ ఫార్ములా. రీల్ లైఫ్, రియల్ లైఫ్ వేర్వేరని తెలిసినా, ఒక్కోసారి రీల్ లైఫ్ లోలాగా రియల్ లైఫ్ లో జరిగితే బాగుంటుందనిపిస్తుంది. అవినీతి పై యుద్ధం చేస్తానని ఎవరైనా ప్రకటించగానే, సినిమాల్లో హీరో  లాగా, వీరు కూడా విజయం సాధిస్తే అవినీతి పూర్తిగా అంతమైపోతుందేమోననే చిన్న ఆశ అందర్లోనూ.
 “ఆయనెవరో అవినీతి మీద యుద్ధం ప్రకటించాడంట, అవినీతి అంతమయ్యే వరకూ అన్నం ముట్టనని, గాంధీ గారిలాగా దీక్ష చేస్తున్నాడంట, అదేదో బిల్లు తెమ్మని అడుగుతున్నాడంట, దానికి మన పెబుత్వమోల్లు ఒప్పుకోవడం లేదంట, ఆ బిల్లు గాని తెస్తే, లోక్ పాల్ అని ఎవరో ఒకాయన వస్తాడంట, అవినీతి పరుల్నందర్నీ చిన్న పెద్ద తేడాల్లేకుండా ఎక్కడికక్కడే శిక్షిస్తాడంట, అలాగ్గాని  చేస్తే మన దేశంలో అవినీతి అనేదే ఉండదంట.

జై దీచ్చ, డౌన్ డౌన్ పెబుత్వం”.  - ఇదీ ఇంటర్నెట్లోని వివిధ సైట్లలో మెజారిటీ నెటిజన్ల కామెంట్ల సారాంశం.

                                                  

దీక్షాసీనులు, వీరి మద్దతుదార్లు అందరూ 'పౌర సమాజం' అని ఓ పేరు పెట్టేసుకుని, మేము చెప్పినట్లు బిల్లు తెస్తారా లేక మల్లీ దీచ్చ చేయాల్నా అని, ప్రభుత్వంతో చర్చలు సాగిస్తున్నారు. ఈ సమాజమోల్లు చెప్పేది వినడానికి బాగానే ఉంది కానీ, కాస్త లోతుగా అలోచిస్తేనే, బొమ్మకున్న మరో కోణం పై అణుమాణాలు కలిగేది.

ఇంతకూ ఈ లోక్ పాల్ ని ఏ స్వర్గం నుంచి, ఎవరు పట్టుకొస్తరు?

ప్రధాన మంత్రి పైన ఐనా, సుప్రీం కోర్ట్ న్యాయమూర్తులపై ఐనా సూమోటో గా కేసులు బనాయించే అధికారం, శిక్షలు వేసే అధికారాలు కూడా కావాలంటున్న ఈ లోక్పాల్ ని ఎవరు ఎలా నియమిస్తారనే దానిమీద ఇంకా స్పష్టత రావాల్సి ఉంది.  పౌర సమాజ ప్రతినిధులు చెప్పేదాని ప్రకారమైతే,  లోక్ పాల్ సెలెక్షన్లో ప్రజలకు గానీ,ప్రజా ప్రతినిధులకు గానీ ఎలాంటి సంబంధం ఉండదు. అంటే,ప్రజల చేత ఎన్నుకోబడిన MPలు,MPల చేత ఎన్నుకోబడిన PM, Cabinetలు ఓ పక్క, వీరితో సంబంధం లేకుండా వీరందరికంటే ఎక్కువ అధికారాలుగల లోక్పాల్ మరో పక్క అన్నమాట. ఇన్ని అధికారాలుగల లోక్పాల్ కి కుల,మత,ప్రంతీయ రాగ ద్వేషాలు గాని ఉంటే, ఇక అప్పుడు పరిస్థితులు ఎలా ఉంటాయో ఊహించవచ్చు. ఇలాంటి రాగ ద్వేషాలు లేని నిఖార్సైన వ్యక్తి ఐనంతవరకూ ఎలాంటి సమస్య ఉండకపోవచ్చు.  అలాంటి నిఖార్సైన వ్యక్తిని ఎవరు,ఎలా ఎన్నుకుంటారనేది అసలు సమస్య. 

ఉదాహరణకి, నెక్స్ట్ పార్లమెంట్ ఎలక్షన్స్ లో NDA అధికారంలోకి వచ్చిందనుకుందాం. అప్పుడు లోక్ పాల్ గా ఏ కాంగ్రేస్ పార్టీ  సానుభూతిపరుడో ఉంటే పరిస్తితి ఎలా ఉంటుంది? కాంగ్రేస్ పార్టీ వారు ప్రతి రోజూ NDA ప్రధాని మీద ఏదో ఒక ఆరోపణ చేయడం, దాని ఆధారంగా లోక్ పాల్ ప్రధానిని విచారించడం,విసిగించడం.. వీలైతే మార్చమని అడగటం..ఇదీ తంతు.

లోక్పాల్ పాపాల్ చేస్తే..?

 "మానవుడు పాపి, పాపాల్ చేయని మానవుడు ఎవడూ ఉండడు" అని K.A.పాల్ చెప్పినట్లుగా, లోక్పాల్ ఏ మైనా తప్పులు చెస్తే, అతన్ని శిక్షించే అధికారం,పదవి నుంచి తొలగించే అధికారం ఎవరికుంది అనే దాని మీద, పౌర సమాజా ప్రతినిధులక్కూడా స్పష్టత ఉన్నట్లులేదు. ఒక వేల, లోక్ పాల్ ని శిక్షించే అధికారం ప్రధాన మంత్రికి కానీ, న్యాయ వ్యవస్థ కి కానీ  ఉందనుకుంటే, వీరిని మల్లీ లొక్ పాల్ కిందికి తేవాలనడం అర్థరహితం. నీతి,నిజాయితీలతో పనిచేస్తామని ప్రజల వోట్లతో గెలిచి, మల్లీ ఐదేల్ల తర్వాత ప్రజల ముందుకెల్లాల్సి ఉంటుందని తెలిసిన ప్రజాప్రతినిధులే ఇంతలా అవినీతికి పాల్పడుతున్నప్పుడు, ఇవేవీ లేకుండా ఎవరో కొందరు వ్యక్తులు అపాయింట్ చేసిన ఓ అధికారి మాత్రం నీతిగా,ప్రలోభాలకు లొంగకుండా ఉంటాడని ఎలా నమ్మడం?  

ఇంతకూ వీరు ఎలక్షన్స్ లో ఎందుకు నిలబడరు?

 

ప్రజాస్వామ్యము, ఎన్నికలలో పోటీ చేయడం వంటి వాటిమీద, ఈ దీక్షాసీనుల అభిప్రాయం కాస్త కంఫ్యూజింగ్ గా ఉంది. తమకు 100 కోట్ల భారతీయుల మద్దతు ఉందనీ, తమ మీద దాడులు చేసినా,తమ అభిప్రాయాన్ని పరిగణన లోకి తీసుకోకున్నా దేశ ప్రజల్ని అవమానించడమే అన్నట్లుగా మాట్లాడుతుంటారు. వీరికి అంత మంది మద్దతు ఉన్నప్పుడు, వీరే ఎలక్షన్లలో నిలబడవచ్చు కదా? నిజంగానే అంత మంది మద్దతిస్తే నెక్స్ట్ పార్లమెంట్ ఎలక్షన్స్ లో బంపర్ మెజారిటీతో గెలిచి వీరే అధికారం లోకి రావచ్చు. అప్పుడు ఎన్ని బిల్లులైనా నిరభ్యంతరంగా చేసుకోవచ్చు. దానికి మహా అంటే మరో 5 ఏల్లు పట్టవచ్చు. అవినీతిని ఇన్నేల్లు సహించాక, మరో 5 ఏల్లు ఆగలేరా..?  అప్పట్లో అంటే, చట్టం బ్రిటీష్ వారిది కాబట్టి, మరో దారి లేక గాంధీ గారు నిరాహార దీక్షలు చేయాల్సి వచ్చింది. ఇప్పుడున్న చట్టం మనం రాసుకున్నది. ప్రభుత్వ పరిపాలనలో ఏమైనా లోపాలున్నాయనుకున్నప్పుడు, ఆ లోపాలేవో జనాలకు వివరించి, జనం మద్దతు ఉందనుకుంటే ఎవరైనా సరే స్వయంగా ఎన్నికల్లో పోటీ చేసి, ప్రభుత్వాన్ని నడుపుకోవచ్చు. దీనికి కాస్త సమయం పట్టవచ్చేమో కానీ, అసాధ్యం మాత్రం కాదు.    ఈజిప్ట్,లిబియా,టూనీషియా,బహ్రైన్ లాంటి చిన్న,చిన్న దేశాలు కూడా తమకు ప్రజాస్వామ్యం కావాలని ఉద్యమాలు చేస్తుంటే,మన దేశంలో మాత్రం, ప్రజాస్వామ్య ప్రభుత్వాల కంటే, సర్వాధికారాలు కల ,ప్రజలతో ఎన్నుకోబడని డిక్టేటర్ లాంటి వ్యవస్థ కావలని ఉద్యమాలు జరుగుతుండటం శోచనీయం.

ఏదేమైనా, అవినీతి పైన దేశ ప్రజలకు ఎంత ఏహ్యభావం, ఆగ్రహం ఉందో నిరూపించడంలో మాత్రం, పౌర సమాజ ప్రతినిధులు పూర్తిగా విజయం సాధించారు. దానికి వీరిని  అభినందించవలసిందే. అట్లే అవినీతిని అరికట్టడానికి తీసుకునే ఏ చర్య ఐనా, ప్రజాస్వమ్య చట్టాలకు లోబడి, ప్రజాస్వామ్యాన్ని బలపరిచేదిగానే ఉండాలితప్ప , బలహీన పరిచేదిగా మాత్రం ఉండదని ఆశిద్దాం.

మాగొప్ప మోడీ గురించి ఓ వ్యాసం లింక్

http://greatindiannews.com/2011/04/16/narendra-modi-adolf-hitler/